Il reglamaint dals tarifs exista dischplaschaivelmaing intant be in lingua tudais-cha.
Bainvgnü
Bainvgnü pro la chüra d’uffans per pitschens uffants da 0-5 ons.
Nus spordschain duos models da chüra cun ils quals pudain ir aint sün ils bsögns da famiglia individuals e spordscher la megldra chüra pussibla per lur uffants:
Famiglias da di – structura sumglainta a la famiglia cun uraris flexibels
Canorta – structura cumplementara a la famiglia cun uraris fixs
Canorta
INsembel, ün CUN tschel ed ün DA tschel.
In nossa canorta vain minchün STIMÀ ed INTRETSCHÀ. Genituors, uffants ed il team da la canorta. Nus imprendain ün DA tschel da maniera ludica e ramassain ün CUN tschel experienzas e fuormain nos minchadi cumünaivel.
Nus chürain di per di üna relaziun amuraivla e cun respet. Lapro ans orientaina als bsögns ed al buonder natüral dals uffants. Els vöglian scuvrir e perscrutar, creschan tras arcugnuschentscha ed affecziun. E precis a quists bsögns importants dals uffants dain nus ün dachasa.
Per nus significha educar accumpagnar e sustgnair. Rituals cumünaivels ed üna clera structura da l’andamaint dal di.
Sporta
Illa canorta vegnan chürats maximalmaing 16 uffants al di a partir da 3 mais fin pro’l cumanzamaint da scoulina.
Il team consista da quatter educaturas da professiun e da duos fin trais imprendistas.
Duos cuschinunzas ed üna nettiadra cumpletteschan il team.
Il persunal qualifichà fa stima, cha dasper il lung temp da giovar, possa mincha singul uffant eir imprender da maniera ludica adequata. Cun nossa sporta pedagogica lain nus accumpagnar e sustgnair da maniera adattada a l‘età il svilup social, emoziunal, linguistic, spiertal e corporal dals uffants.
- contuorns d‘imprender: gös da rolla, movimaint/musica, construir/fabrichar, fuormar/crear, minchadi, natüra, lingua
- lavurs da proget chi includan tuot las etats
- giovar e scuvrir illa natüra
- il giovar=imprender orientà als sens
- CUNdecider /INvolvà pro acziuns dal minchad
(p.ex. metter maisa, cuschinar) - evenimaints cumünaivels/excursiuns/dis da god
- comunicaziun transparenta cun genituors ed instituziuns
Localitats
Dasper üna gardaroba persunala chi invida da gnir aint, stan a disposiziun als uffants ün local per durmir separà, ün local per zambriar, büglins e tualettas, tuot adattà per uffants, sco eir üna chadafö.
Nus fain stima a materials da gös chi promouvan ils sens sco per exaimpel a paraids per palpar, maisas da tema, ufficina e chantuns per sfuar. Per pudair satisfar al grond bsögn da movimaint dals uffants, dovraina la sala da gimnastica da la scoula cunfinanta, la plazza da giovar chi’s rechatta güsta daspera e la natüra, saja quai god o pauraria, cun tuot lur aventüras be davant porta.
Nudrimaint
Per nus es mangiar daplü co be tour sü nudritüra: mangiar es giodimaint e dess far in prüma lingia plaschair. Il mangiar cumünaivel ans spordscha ün bun chomp d’exercizi per promouver il cumportamaint social. Per nus esa important chi saja ün’atmosfera locca a maisa. La cumposiziun dals pasts correspuonda ad ün nudrimaint san, equilibrà e stagiunal.
Nus preparain svess ils pasts ed involvain ils uffants. La preparaziun dess esser ün "ün PER tschel" ed il mangiar e rumir sü dessan esser ün "ün CUN tschel".
Il plan da l’eivna cun culazchun, marenda, giantar e marenda da las quatter penda adüna il principi da l’eivna vi da la paraid.
Structuras da di
Cun nossas structuras daina a Lur uffant ün rom i'l qual el po esser creativ, scuvrir sias abiltats e far amicizchas.
7.00 - 9.00
temp per manar / temp da gö liber
7.30 - 8.00
püschain
9.00 - 9.30
rudè da chant e lura marenda
9.30 - 9.45
lavar ils mans / far süt
9.45 - 11.15
excursiun / plazza da giovar / zambriar o gö liber
11.15 - 11.30
rudè da chant / gös i'l rinch
11.20 - 11.30
temp da gnir per davo / temp per manar ils uffants
11.30 - 12.00
giantar cumünaivel
12.00 - 12.15
lavar ils daints ed ils mans / far süt
12.15
ils uffants pitschens van a durmir
12.15 - 12.45
ils uffants grond fan la posa
12.45 - 14.00
giovar quiet / pitturar vi da la maisa
13.00 - 14.00
temp da gnir per davo / temp per manar ils uffants
14.00 - 15.30
excursiuns / activitats manadas
15.30 - 16.00
marenda, per part i'l liber
16.00 - 16.15
lavar ils mans / far süt
16.15 - 18.00
gö liber
16.30 - 18.00
temp per gnir per davo ils uffants
Fasa da s'adüsar
Pels uffants esa üna gronda sfida da s’adattar al nouv minchadi e da fabrichar sü nouvas relaziuns cun persunas estras. Perquai dovraina Seis agüd sco persuna chi’d es statta fin uossa la persuna da referimaint. Per quel motiv vegnan ils uffants beneventats in ün möd fin e precaut. In üna fasa da s’adüsar da duos eivnas vain fabrichada sü be plan la relaziun cullas educaturas e la gruppa tenor il “model da Berlin“.
Models da chüra / tariffas
Il team da la canorta es quia pels pitschens da lündeschdi fin venderdi, adüna da las 07.00 fin a las 18.00.
Eir dürant las vacanzas ufficialas.
Per realisar üna rutina da minchadi pella gruppa e structuras adattadas als uffants, vain nus uraris da manar e da gnir per davo pels uffants, chi sun fixs. I’s po tscherner tanter dis da chüra inters, chüra d’avantmezdi o da davomezdi, cun o sainza giantar.
Ün’invista in nossa concepziun da cuosts sco eir i’l reglamaint as survegna suotvart.
Contact ed annunzcha
Nus stain gugent a disposiziun per ün discuors in qual cha nus pudain preschantar la canorta e las collavuraturas.
Infuormaziuns plü precisas pon Els leger i'l formular d'annunzcha.
Contact & annunzcha
Canorta Villa Milla
Gabriela Greiser
Bagnera 171
7550 Scuol
Tel. 081 862 24 04
Famiglias da di
La chüra in üna famiglia da di fuorma ün’important segmaint illa chüra d’uffants supplementara a la famiglia. Quista fuorma da chüra es bainvissa, perquai cha’ls temps da chüra pon gnir fixats in ün möd fich flexibel e perquai chi vain fabrichà sü ün contact stret tanter la mamma da di e/o il bap da di. Els pon dvantar üna seguonda famiglia per Lur uffant.
Las famiglias vegnan examinadas minuziusamaing e dispuonan dad ün permiss chantunal per pudair chürar uffants. Ellas absolveschan üna scolaziun obligatorica da basa sco eir ün cuors da prüm agüd e d’accidaint dad uffants pitschens e s’oblieschan da far regularmaing scolaziuns da perfecziunamaint.
Sco patruna da lavur es la «Famiglias da di» respunsabla pell’intermediaziun, la paja sco eir pellas sgüranzas da las famiglias da di e survaglia la qualità da la chüra.
Tariffas
Ün’invista in nossa concepziun da cuosts sco eir i’l reglamaint as survegna suotvart.
Il reglamaint dals tarifs exista dischplaschaivelmaing intant be in lingua tudais-cha.
Dvantar mamma da di / bap da di
Genituors da di nu douvran insè üna scolaziun speciala. Il catalog da pretaisas muossa però, quant pretensiusa cha quista lavur es.
Genituors da di stuvessan:
- avair interess per uffants sco eir per lavur d’educaziun e da famiglia;
- avair experienza cun uffants;
- avair temp e lö per ün o plüs uffants da di e la prontezza dad acceptar ün impegn regular;
- esser averts per laschar gnir ad ün uffant ill’aigna famiglia e da til integrar;
- surgnir l’acconsentimaint dal partenari o da la partenaria sco eir dals uffants, perquai cha tuot la famiglia es pertocca schi’s piglia in chüra ün uffant da di;
- as sentir bain ed esser sgürs illa rolla da genitur ed avair la fiduzcha d’esser capabels da s’ingaschar per las aignas imaginaziuns d’educaziun invers otras famiglias;
- esser averts e tolerants invers otras opiniuns e stils da viver;
- esser averts per discuors e per cumpromiss, esser fidats ed avair sen da respunsabiltà;
- star bain psichicamaing e corporalmaing
- as savair cunfinar ed esser pronts da retschaiver agüd e sustegn in situaziuns difficilas;
- esser pronts da far scolaziuns da perfecziunamaint (cuors da basa, frequentaziun annuala da perfecziunamaints);
Contact ed annunzcha
Cuosts: fr. 50.00 contribuziun d'annunzcha tenor reglamaint da tarifs.
Il formular d'annunzcha exista dischplaschaivelmaing pel mumaint be in lingua tudais-cha.
Contact & annunzcha
Famiglias da di
Tamara Meyer
Bagnera 171
7550 Scuol
Tel. 079 902 94 78